மன்னார்குடி ஸ்ரீ ராஜகோபால ஸ்வாமி கோயில் / கண்ணுக்கினியன கண்டோம்-9

ஸ்ரீ ராஜகோபால ஸ்வாமி கோயில்.

   

ஊர்: மன்னார்குடி/ராஜமன்னார்குடி (செம்பகாரண்ய க்ஷேத்ரம்) 

மூலவர்: பரவாசுதேவர், நின்ற திருக்கோலம், கிழக்கே திருமுக மண்டலம் 

உற்சவர்: ஸ்ரீவித்யா ராஜகோபாலன் / ராஜகோபாலன் ருக்மணி சத்யபாமா ஸமேதராக 

தாயார்: செம்பகலக்ஷ்மி (மூலவர்) 

உற்சவர்: செங்கமலத் தாயார் ஹேமாப்ஜ நாயகி, ரக்தாப்ஜ நாயகி 

தனிச் சன்னதிகள்: ஸ்ரீ ஆண்டாள், ஸ்ரீ ஆஞ்சனேயர், ஆழ்வார்கள், ஆச்சார்யர்கள், ஸ்ரீ கோதண்ட ராமர், ஸ்ரீ துர்க்கை, தும்பிக்கையாழ்வார் சன்னதிகள் 

விமானம்: ஸ்வயம்பு 

தலவிருக்ஷம்: சண்பகம் 

தீர்த்தம்: ஹரித்ரா நதி (நதியைப் போன்ற மிகப்பெரிய தெப்பக்குளம்), பாம்பணி நதி, கிருஷ்ணா தீர்த்தம், கோப்ரளய தீர்த்தம், துர்வாச தீர்த்தம், திருப்பாற்கடல், கோபிகா தீர்த்தம், சங்கு தீர்த்தம், சக்கர தீர்த்தம் ஆகிய 9 தீர்த்தங்கள். காவிரியின் கிளை நதியான பாமணி ஆறு, பத்தாவது புண்ணிய நீர் நிலையாக சொல்லப்படுகிறது. 

மண்டபங்கள்: 7 

பிரத்யக்ஷம்/ திருக்காட்சி: பிரம்மா, ப்ருகு ,அக்னி,கோபில-கோப்ரளய ரிஷிகள் 

ஆகமம்: பாஞ்சராத்ரம் 

பழமை: 1000 வருடங்களுக்கு மேல். 

உற்சவங்கள்/ திருவிழா: தெப்போற்சவம், ஆவணி மாதத்தில் பவித்ரோத்ஸவம் , பங்குனி பிரம்மோற்சவம், விடையாற்றி உற்சவம். வெண்ணெய்த்தாழி பல்லக்கு மற்றும் தங்கக் குதிரை வாகனம் ஆகியவை மிகமிகச் சிறப்பானவை. 

பிரார்த்தனை: இங்குள்ள சந்தான கிருஷ்ணரை மடியில் வைத்துக் கொண்டால் குழந்தையில்லாத் தம்பதியருக்குக் குழந்தை பிறக்கும் என்று ஐதீகம். 

கோயில் திறந்திருக்கும் நேரம்: காலை 6.30 மணி முதல் 12 மணி வரை, 
மாலை 4.30 மணி முதல் இரவு 9 மணி வரை

ஸ்தலப்பெருமை: 

மன்னார்குடி. எனது பாட்டியின் பிறந்த ஊர். சன்னதித் தெருவிலேயே பாட்டி வளர்ந்த வீடு இன்றும் உள்ளது. இக்கோவிலைப் பற்றி அவர் நிறைய சொல்லக் கேட்டிருக்கிறேன். அதிலும் பாட்டி, “என் ராஜகோபாலன்” என்றே சொல்லுவார். “என் ராஜகோபாலன் கொள்ளை அழகு. அவனது முகத்தைப் பாசத்தோடு நோக்கிக் கொண்டிருக்கும் பசுமாடும் கன்றுகளும் அழகோ அழகு. ராஜகோபாலன் ஏக வஸ்த்ரதாரி. எந்த அலங்காரமாக இருந்தாலும் ராஜகோபாலனுக்கு ஒற்றை வஸ்திரம்தான். இடுப்பில் ஒரே வஸ்த்ரம். அதே வஸ்த்ரத்தைத் தலைப்பாகையாய் சுற்றிக்கொண்டு, இடுப்பில் ஒட்டியாணம், கிண்கிணிகளுடன் கூடிய அரைஞாண், அதில் தொங்கும் சாவிக்கொத்து, கையில் வளையல், காலில் தண்டை, கொலுசு, ஒரு கையில் சாட்டையுடன், மற்றொரு கையில் ‘செண்டு’ சொருகிக் கொண்டு, இடது கையை பக்கத்தில் நிற்கும் தன் தோழன் தோளில் போட்டபடி கொள்ளைச் சிரிப்புடன், ஒருகாதில் குண்டலம், இன்னொருகாதில் தோடு, அருகில் பசுவும் இரு கன்றுகளும் சூழ, மாடு கன்று மேய்க்கும் பாலகனாக, இடையனாக ராஜகோபாலன் ஸேவை சாதிப்பார்”என்று சொல்வார். கேட்கும்போதே செல்லவேண்டும் என்ற ஆசை ஏற்படும்.

“செண்டா? அப்படின்னா என்ன பாட்டி?” என்பேன்.

“அது தொரட்டி. இடையனோல்லியோ? மாடுகளுக்கு தழை, இலை எல்லாம் வெட்டிப் போடணுமோன்னோ? அதுக்காக தொரட்டி மாதிரி வெச்சுண்டு இருப்பான்” என்பார்.

கேள்விப்பட்டது நிறையவாயினும் மன்னார்குடி சென்று ஸேவித்ததே இல்லை. சில வருடங்கள் முன் சென்று பெருமாளைத் தரிசிக்கும் பாக்கியமும் கிட்டியது. பதிவிட இன்றுதான் அமைந்தது. 

மன்னார்குடி. அபிமான ஸ்தலம். ஆழ்வார்களால் மங்களாசாசனம் செய்யப்பட்ட திவ்யதேசம் அல்ல. எனினும் குறைவில்லாத மகத்துவம் கொண்டது. 'கோவில்பாதி, குளம்பாதி' என்ற பழமொழி உண்டானதே இந்த ஊரால் தான் என்று சொல்வர். அவ்வளவு பெரிய கோவில் அவ்வளவு குளங்கள். ‘மன்னார்குடி மதில் அழகு’ என்பது இவ்வூருக்கு மேலும் பெருமை சேர்க்கிறது. முதலாம் குலோத்துங்கன் கட்டிய கோவில். 

இத்தலப் பெருமாளுக்கு "சதுர்யுகம் கண்ட பெருமாள்' என்பது திருநாமம். ஸ்ரீ ராஜகோபால ஸ்வாமிக்கு "ராஜமன்னார்' என்ற பெயரும் உண்டு. ராஜமன்னார் கோயில் கொண்ட ஊர் என்பதால் இவ்வூர் "மன்னார்குடி' என்றும் கூறுவர். துவாரகைக்கு சமமான புனிதத் தலம். மிக உயர்ந்த ராஜகோபுரம், அழகிய மண்டபங்கள், சிற்ப வேலைப்பாடுகள் நிறைந்த மேற்கு கோபுரம். தக்ஷிணத் துவாரகை, வாசுதேவபுரி, இந்த ஊரின் வேறு பெயர்களாகும். செண்பக மரங்கள் அடர்ந்த காடுகள் நிறைந்து காணப்பட்டதனால் செண்பகாரண்ய க்ஷேத்திரம். ஸ்ரீ ராஜகோபாலன் கோயில் கொண்டிருப்பதால் ராஜமன்னார்குடி. இவ்விடத்தில் கோபில-கோப்ரளய மகரிஷிகளுக்கு கிருஷ்ண லீலைகளைக் காட்டி அருளியதால் தக்ஷிண த்வாரகை. மூலவர் வாசுதேவன் என்பதால் வாசுதேவபுரி, என்று இந்த ஸ்தலத்திற்குப் பல பெயர்கள். 

நாங்கள் கோவிலுக்குச் செல்லும்போது மாலை நேரம். மிக விசாலமான சாலையின் நடுவே மிக உயரமான, ராஜ கோபுரத்தின் உயரத்திற்கு இணையாக ஓங்கி உயர்ந்திருக்கும் கருட ஸ்தம்பம். அதன் உச்சியில் உள்ள கருட மண்டபத்தில் கருடன் ஸேவை சாதிக்கின்றார். இந்த கருட ஸ்தம்பம் 54 அடி உயரமாம்! ஒரே கல்லில் செதுக்கப்பட்டதாம். கருட ஸ்தம்பத்திற்குப் பின்னே கம்பீரமாக நிற்கும் ராஜகோபுரத்தைப் பார்க்கும்போதே பரவசம். ராஜகோபுரமும் ஊரின் எந்தப் பகுதியிலிருந்து பார்த்தாலும் தெரியுமாம். 154 அடி உயரம்!! 

ராஜகோபுரத்தைக் கடந்து சென்றால், மீண்டும் ஒரு ஐந்து நிலை கோபுரம். 

கோபுர வாயிலில் குழந்தை போல் விஷமம் செய்து கொண்டு ஒரு குட்டி யானை. ஒரே துறுதுறுப்பு. சாயலில் சிறிய வித்தியாசம் எனக்குப் பட்டது. வழக்கம் போல் என் கணவர் யானைக் குட்டியிடம் ஆசீர்வாதம் வாங்க, பாகன், “செண்பகம், ஆசீர்வாதம் குடு” என்றார். இப்போதுதான் புரிந்தது, அது பெண்யானை என்று. அதன் நெற்றியில் வழக்கமாக இடப்பட்டிருக்கும் திருமண் இல்லை, ஸ்ரீசூர்ணம் மட்டும்தான். அதுதான் எனக்கு வித்தியாசமாகப் பட்டிருக்கின்றது. விஷமக்குட்டி செண்பகத்தையும் படம் பிடித்துக் கொண்டோம். 

ராஜகோபாலனைக் காணும் ஆவலில் விறுவிறுவென த்வஜஸ்தம்பம் ஸேவித்து, தாயார் சன்னிதி சென்றோம். வைணவர்கள் தாயார் சன்னதியை முதலில் ஸேவிப்பது வழக்கம். தாயார் தயை மிக்கவள். நாம் செய்யும் தவறுகளை மன்னிக்கச் சொல்லி பெருமாளிடம் சொல்வாளாம். எப்படி நமது வீடுகளில் அம்மாவானவள் அப்பாவிடம் ‘குழந்தை பாவம் அவனை ஒண்ணும் சொல்லாதீங்கோ என்பதைப் போலே’. பெரியோர்கள், அறிந்தவர்கள் சொல்லக் கேட்டிருக்கிறேன். தாயார் சன்னிதி செல்லும் வழியில் அஷ்டலக்ஷ்மியுடன் ஆமை மீது பிரம்மாண்டமாக ஒரு துளசிமாடம். செம்பகலக்ஷ்மி தாயாரையும் ஸேவித்தோம். தாயார் சன்னதி எதிரே பெண் வடிவ கருடாழ்வார் இருக்கிறார். ஆஞ்சனேயர் சன்னதியில் வாய் பேசாத சிலர் கைங்கர்யம் செய்து கொண்டிருக்கின்றார்கள். 

பெருமாள் சன்னதியை அடைந்தோம். மூலவர் வாசுதேவர் ஸ்ரீதேவி பூதேவி நாச்சியார்களுடன் ஏகாந்தமாய் இருந்தார். நன்கு ஸேவித்தோம். பக்கத்திலே சந்தானகோபாலன். பட்டர் க்ஷேத்ர விசேஷங்களைச் சொல்கிறார். சொல்லிவிட்டு, சந்தானகோபாலனை என் கையில் கொடுத்தார். சிறிதும் எதிர்பார்க்கவில்லை. அழகான க்ருஷ்ண விக்ரஹம். வாங்கிக் கொண்டேன். ஆலிலை கிருஷ்ணர் போல, கால் விரலை வாயில் வைத்தபடி ஆதிசேஷனில் படுத்திருக்கிறார். அஹோ பாக்கியம்! என் இஷ்ட தெய்வம் என் கைகளில். குட்டி கிருஷ்ணனின் அழகைக் கண்ணாரக் கண்டோம் கண்டோம் கண்டோம்! கீழே உட்கார்ந்து, மடியில் விட்டுக் கொண்டு தாலாட்டச் சொன்னார். குட்டி கிருஷ்ணனைக் கையில் வாங்கிப் பிரார்த்தனை பண்ணிக் கொள்வது விசேஷமாம். கண்ணனே கையில் வந்தபின் வேண்டுவது வேறென்ன? சந்தான பாக்கியம் வேண்டுபவர்கள் சந்தானகோபாலனைத் தங்கள் கையிலே வாங்கிப் பிரார்த்தனை செய்தால் நிச்சயம் குழந்தை பாக்கியம் கிடைக்குமாம். ரோகிணி நட்சத்திரத்தன்று பிரார்த்தனை செய்தால் விசேஷமாம். சன்னதியில் பலர் சந்தானகோபாலனைக் கையில் வாங்கக்காத்து நிற்கிறார்கள். பலர் இந்தப் பெருமானை வேண்டிக் கொண்டு சந்தான பாக்கியம் கிடைக்கப் பெறுகிறார்கள். 

குழந்தைக் கண்ணனைக் கொடுக்கவே மனமில்லை. மிகுந்த மனநிறைவாய் இருந்தது. என் கண்கள் ராஜகோபாலனைத் தேடின. உற்சவர் எங்கே என்று பட்டரிடம் கேட்டேன். பட்டர், “இன்று கருட சேவை, அதனால் பெருமாளை கருடன்மேல் ஏளப்பண்ண எடுத்துச் சென்றுவிட்டார்கள். முன் மண்டபத்தில் அலங்காரம் செய்தபிறகு பார்க்கலாம்” என்று சொன்னார். 

பாட்டி சொன்ன, படங்களில் பார்த்த, அழகான அந்த ராஜகோபாலனைக் காண வேண்டும் என்பது என் நெடுநாளைய ஆசை. படங்களில் பார்க்கும்போது, மாடு கன்றுக்கு இருக்கும் பக்தி நமக்கு இல்லையே என்று தோன்றும். வாய்ப்பு கிடைத்தும் ‘ராஜகோபாலனை’ ஸேவிக்க  முடியவில்லை என்ற ஆதங்கம். இரவே சென்னைக்கு ரயிலைப் பிடிக்க வேண்டும். அழுகை முட்டிக் கொண்டு வந்தது. எப்படியும் இருந்து ஸேவித்துவிட்டே போகலாம் கவலைப்படாதே என்று என் கணவர் கூறினார். 

சன்னிதியை விட்டு வெளியே வந்தால் துர்க்கை, தும்பிக்கையாழ்வார் சன்னதிகள். ராஜகோபாலனைக் காண முடியுமோ முடியாதோ என்ற கவலை. அவசரமாக பிரதக்ஷணம் செய்து கோவிலுக்கு வெளியே உள்ள மண்டபம் சென்றோம். அலங்காரம் முடிய நேரமாகும், முடிந்ததும் ஸேவிக்கலாம் என்று சொன்னார்கள். காத்திருந்தோம். சுமார் ஒன்றரை மணி நேரம் காத்திருந்த பின்னர், ராஜகோபாலனை, கண்ணுக்கினியானை, மன்னார்குடி அழகனை, ஸ்ரீவித்யா ராஜகோபாலனை, உள்ளத்தைக் கொள்ளை கொள்ளும் அழகுடன் கருடன் மீது கண்டோம்! கண்டோம்! நன்கு ஸேவித்தோம். 

ஆச்சர்யமாக என் தூரத்து உறவினர் ஒருவரைப் பார்த்தோம். அன்றிரவு, அவர் வீட்டில் தான் சாப்பிட வேண்டும் என்று அன்பாக சொன்னார். சாப்பிட்டுவிட்டு உரிய நேரத்தில் சென்னை ரயிலைப் பிடித்தோம். 

ஆயினும், இடையர் கோலத்தில் ஸேவிக்க இயலவில்லை என்பது குறைதான். இடையர் கோலத்தை ஸேவிக்கும் வாய்ப்பு அமையப் பிரார்த்திக்கிறேன். 

விசேஷங்கள்: 

தை 4ம் நாள் சேர்த்தி, தாயாருடன் சேர்ந்து “ஏக சிம்மாசனத்தில்” ஸேவை சாதிக்கிறார்.  

                                                               
Eka simhasana sevai
Picture courtesy: Mannargudi rajagopalaswamy FB page

பங்குனியில் 18 நாட்கள் பிரம்மோத்ஸவம் நடக்கிறது. தினமும் வித விதமான அலங்காரங்கள்.

பிரம்மோற்சவத்தின் பதினாறாம் நாள் "வெண்ணெய் தாழி' உற்சவம் நடக்கிறது. வெகு பிரசித்தம். அப்போது பெருமாள் பல்லக்கில், தவழ்ந்த திருக்கோலத்தில், கையில் வெள்ளி வெண்ணெய்க்குடத்துடன் திருவீதியுலா செல்கிறார். வெண்ணெய்த்தாழி மண்டபத்துக்குச் செல்லும்போது, வழி நெடுகிலும் பக்தர்கள் வெண்ணெய் வீசி மகிழ்கின்றனர். பக்தர்கள் கண்ணனுக்கு பிரியமான வெண்ணை மற்றும் விசிறி கொடுத்து வணங்குவார்கள். நவநீத க்ருஷ்ணனின் பின்னழகைப் பார்க்கக் கூட்டம் கூடும். அன்று செட்டி அலங்காரத்தில் ஸேவிக்கலாம். மாலை தங்கக் குதிரை வாகனத்தில் சந்நிதிக்கு எழுந்தருள்வார்.

 Navaneethakrishnan pinnazhagu 
 Picture courtesy: Mannargudi rajagopalaswamy FB page

தேரெழுந்தூர் ஆண்டவன் ஒரு முறை வெண்ணைத் தாழி உற்சவத்திற்குச் சென்றிருந்தாராம். பெருமாளின் பின்னழகையும், அழகிய குஞ்சிதபாதங்களையும் பார்க்கக் கூட்டம் கூடியதாம். கூட இருந்த ஒரு பாகவதோத்தமரிடம் ஆண்டவன் கேட்டாராம், “ஏன் ஸ்வாமி, பாகவாதாள்லாம் இன்னைக்கு ராஜகோபாலனின் பின்புறம் சேவிக்கிறார்கள்?உமக்குத் தெரிந்திருக்குமே, தாத்பர்யம்...சொல்லுமே”என்று. அப்போது அந்த ஸ்வாமிகள், “அணியும் ஆபரணங்களின் அழகு ஆபரணம் பூண்டு கொள்ளும் புருஷனைப் பொறுத்து அமைகிறது. அவ்வகையில் நவநீத க்ருஷ்ணனின் பின்னழகில் பூணப்பட்டிருக்கும் ஆபரணங்கள் அழகுடன் மிளிர்கிறது; அதைக் காண பக்தர் கூட்டம் அலை மோதுகிறது “என்றாராம். ஆண்டவன் அக்கருத்தையும் ஸ்லாகித்து தனது அவதானத்தையும் கூறினாராம் இப்படி! ”தினம் பெருமாளின் அலங்காரமும்,வாகனமும் சேவிக்கும் பாகவதர்கள் அவனது திருவடியைப் பிரதானமாக சேவிக்கின்றனர். இன்று நவனீத க்ருஷ்ணணின் திருவடி மடங்கி பின்புறம் இருப்பதால் அவனின் திருவடிகளை சேவிக்க பின் பக்கம் திரண்டுள்ளனர்”என்று திருவடிகள் மேன்மையை ஸ்லாகித்தாயிற்று. 

(மதுரை தேசிகர் சன்னிதியில் பாதுகாப்ரபாவம் குறித்த உபன்யாசத்தில் ஆண்டவன் ஆஸ்ரமம் ஸ்ரீகார்யம் வீரராகாசார்யர் சொல்லியதை பகிர்ந்த நாராயணன் சேஷாத்ரி அவர்களுக்கு நன்றி.) 

முகவரி: அருள்மிகு ராஜகோபாலசுவாமி திருக்கோயில், மன்னார்குடி - 614 001 திருவாரூர் மாவட்டம். தமிழ்நாடு, இந்தியா. 

திருவாரூர், கும்பகோணம், தஞ்சாவூர், பட்டுக்கோட்டை முதலிய இடங்களிலிருந்து பஸ் வசதி உள்ளது. சென்னை, திருப்பதி, கோவை, மானாமதுரை ஆகிய நகரங்களில் இருந்து இரயில் வசதியும் உள்ளது. 

சென்னை வேளச்சேரி ஸ்ரீ யோக நரஸிம்ம ஸ்வாமி கோயில் / CHENNAI VELACHERY SRI YOGA NARASIMHASWAMY TEMPLE/ கண்ணுக்கினியன கண்டோம்-8

As some of my readers requested to write in english, I have written both in tamil and in english.

ஊர் : வேளச்சேரி, சென்னை

மூலவர்: ஸ்ரீ யோக நரஸிம்ம ஸ்வாமி
உற்சவர்: ஸ்ரீ பக்தவத்ஸலர்(ஸ்ரீதேவி, பூதேவி உபய நாச்சியார்கள்)
தாயார்: ஸ்ரீ அமிர்தபலவல்லித்தாயார்(தனிக்கோயில் நாச்சியார்)
தனிச் சன்னதிகள்: ஸ்ரீ கோதண்டராமர், ஸ்ரீ ஆஞ்சனேயர்
ஸ்தலப்பெயர்: வேதஸ்ரேணி(வேளச்சேரி)
ஸ்தலப் பெருமாள் : வேதநாராயணர்
ப்ரத்யக்ஷம்: ப்ரஹ்லாதன்
விமானம்: வேதபுரி விமானம்
ஆகமம்: ஸ்ரீ பாஞ்சராத்ரம்
ஸம்ப்ரதாயம்: தென்னாச்சார்ய ஸம்ப்ரதாயம்
திருவாராதனம்: பாத்ம ஸம்ஹிதை முறைப்படி
பழமை: 1000 வருடம்

கோயில் திறந்திருக்கும் நேரம்: காலை 7.00 முதல் பகல்10.30 மணி வரை
மாலை 5.00மணி முதல் இரவு 8.30 மணி வரை
(விசேஷ காலங்களில் கோயில் திறந்திருக்கும் நேரம் மாறுதலுக்கு உட்பட்டது)

திருவாராதனம்: காலை 8.00 மணி முதல் 8.30 மணி வரை
மாலை 6.00 மணி முதல் 6.30 மணி வரை

உற்சவங்கள்/ திருவிழா:

ஒவ்வொரு மாதமும் ஸ்வாதி நக்ஷத்திரத்தில் மூலவருக்கு சிறப்பு திருமஞ்சனம். சித்திரை ஸ்வாதி ப்ரம்மோத்ஸவம், வைகாசி ஸ்வாதி வசந்தோத்ஸவம், ஆனி ஸ்வாதி ஜேஷ்டாபிஷேகம், ஆடி ஆண்டாள் திருக்கல்யாணம், புரட்டாசி அன்னக்கூடை, கார்த்திகை பவித்ரோத்ஸவம், மார்கழி மாத தினசரி பூஜைகள், தை கனு உத்ஸவம், பங்குனி தாயார் ப்ரம்மோத்ஸவம் பங்குனி உத்திரம் திருக்கல்யாணம் முதலியவை.

ஸ்தலப்பெருமை:

சதுர்வேதிமங்கலம் /வேதநாராயணபுரம், அதாவது நான்கு வேதங்களும் சொல்லிக்கொடுக்கப்பட்ட இடம். வேள்விகள் நிறைய நடந்ததால் வேதஸ்ரேணி,வேள்விச்சேரி என்ற பெயர் கொண்ட இந்த இடம், பிற்காலத்தில் வேளச்சேரி என மறுவியதாம். மூலஸ்தானத்தில் பெருமாள் ஸ்ரீ யோக நரஸிம்ஹர், நான்கு திருக்கரங்களுடன், வீற்றிருந்த யோக திருக்கோலத்தில் ஸேவை சாதிக்கின்றார். மேற்கே திருமுக மண்டலம். மிக அரிய இந்தத் திருக்கோலத்தில் உள்ள பெருமாள் வரப்ரஸாதி. பெரிய திருவுருவம். பெரியவாய நேத்ரங்கள். பெருமாளின் திருமுக மண்டலத்தைப் பார்க்கும்போது நேத்ரங்களையே பார்த்துக் கொண்டிருக்கலாம் போலத் தோன்றுகிறது. சாந்த ஸ்வரூபியாக பரிவுடன் நம்மைப் பார்த்து அருள் பாலிக்கின்றார். ‘கரியவனைக் காணாத கண் என்ன கண்ணே?’ என்ற பாடல் நினைவுக்கு வருகின்றது. அரங்கனின் கண்ணழகில் மயங்கிய உறங்காவில்லிதாசரைப் போல நாமும் “கண்டோம் கண்டோம் கண்டோம் கண்ணுக் கினியன கண்டோம்” என்று காணுதற்கரிய அழகைக் கண்டு மயங்கி நிற்கிறோம்.

ஸ்தலப் பெருமாள் வேதநாராயணர், வலது கையில் பிரயோக சக்ரத்துடன் காட்சியளிக்கிறார். உற்சவர் பக்தவத்சலப் பெருமாள் ஸ்ரீதேவி, பூதேவியுடன் ஸேவை சாதிக்கின்றார். உற்சவ மூர்த்திகளாக ஸ்ரீ ப்ரஹ்லாதன், ஸ்ரீ ஆண்டாள், ஸ்ரீ ராமானுஜர், ஸ்ரீ மணவாள மாமுனிகள் ஆகியோரையும் ஸேவிக்கலாம்.

ஸ்ரீ அமிர்தபலவல்லித்தாயார் தனிக்கோயில் நாச்சியாராக ஸேவை சாதிக்கின்றார். ஆடி, தை வெள்ளிக்கிழமைகளில் தாயாருக்கு விசேஷ பூஜைகள்.

ஸ்ரீராமருக்கு தனி சன்னதி. உற்சவர் ஸ்ரீராமருடைய வில்லில் பூ முடிந்து வழிபட்டால் திருமணம் கைகூடும் என்று சொல்லப்படுகிறது. ஆஞ்சநேயருக்கும் தனி சந்நிதி உள்ளது.

பிராகாரத்தில், அரசமரமும் வேப்பமரமும் சேர்ந்து இருக்கின்றது. அதனடியில் நாகர் இருக்கிறார்.

வேளச்சேரி விஜயநகரம் பஸ் ஸ்டாண்ட், ரயில் நிலையத்தில் இருந்து 1 km. தொலைவில் உள்ளது. இந்து சமய அறநிலையத்துறை கட்டுப்பாட்டில் உள்ள இக்கோவிலில் பாலாலயம் செய்யப்பட்டு, புனரமைப்பு பணிகள் நடந்து வருகின்றன.

A small gist about the temple:

Velachery Yoga Narasimha Swamy Temple

Shri Yoga Narasimha Swamy Temple is said to be 1000 years old. In olden days, vedas were taught in this place, yagnas were conducted regularly and hence it was called as chathurvedhimangalam/Vedhanarayanapuram and Velvichery, which later became Velachery.

In the sanctum santorum, The Moolavar Sree Yoga Narasimhar with four hands, is in a sitting posture facing west, which is considered rare. The utsavar is Bhakathavatsala perumal with Sridevi & Bhoodevi as consorts. Prahlada is also there. Veda Narayana Perumal is said to be the sthalaperumal and is seen with 'Prayoga Chakra'in his hand.

Thayaar 'Amirthabalavalli' is in a separate sannadhi in the prakaram. There are separate sannadhis for Sri Kothandaramar and Anjaneyar. To those facing delay in marriages, worshipping the utsavar rama idol by tying flower in his bow is said to ensure speedy and successful marriage. Naagar is under the peepal and neem tree.

Tirumanjanam for Moolavar on all swathi nakshathram days. Utsavams like Brahmotsavam, Jyeshtabhishekam, Vasanthotsavam, Panguni uthiram thirukkalyanam, are conducted yearly once.

The temple is situated at 1 km. from Vijayanagaram bus stop and Velachery railway station. The temple is managed by Hindu endowment religious board. The deities are The renovation is under way and the management has proposed to perform the samprokshanam in July 2016.

கூடாரவல்லி

கூடாரை வெல்லும் சீர்க் கோவிந்தா உன் தன்னைப்
பாடிப்பறை கொண்டு யாம்பெறு சம்மானம்
நாடு புகழும் பரிசினால் நன்றாக
சூடகமே தோள்வளையே தோடே செவிப்பூவே
பாடகமே என்றனைய பல்கலனும் யாம் அணிவோம்
ஆடை உடுப்போம் அதன் பின்னே பாற்சோறு
மூட நெய் பெய்து முழங்கை வழிவார
கூடியிருந்து குளிர்ந்தேலோர் எம்பாவாய் -27வது திருப்பாவை.
-
"கூடாரை வெல்லும்" என்பது "கூடாரவல்லி" என்ற வார்த்தையாக மருவியது. மார்கழி 27ம் நாள் பெருமாள் கோயில்களிலும், வைணவர்களின் அகங்களிலும் 'கூடாரவல்லி' கொண்டாடப்படும். அக்கார அடிசில் மற்றும் சர்க்கரைப் பொங்கல் செய்து, நிறைய நெய் மிதக்கும்படியாக விட்டு, பெருமாளுக்குக் கண்டருளப் பண்ணுவார்கள்.

கூடாரை வெல்லும் சீர்க் கோவிந்தா! கூடார் என்பதற்கு எதிரிகள் என்பதைவிட 'நம்மோடு ஒன்றாமல் இருப்பவர்கள்', கூடாதவர்கள் அதாவது, விலகி இருப்பவர்களையும், நண்பராக இருக்க விரும்பாதவரையும் உனது அன்பால் வெல்லும் பெருமை உடைய கோவிந்தா! என்பதாக அர்த்தம். உன்னைப் பாடி அருள் பெற வந்தோம். அவனைப் பாடி, பறை என்னும் நோன்பின் பயனை பெற்றதே புகழுடன் கூடிய சன்மானம் என்கிறாள் ஆண்டாள்.

சூடகம் என்றால் கையில் அணியும் வளையல், தோள்வளை என்றால் வங்கி, தோடு காதில் அணியும் நகை, செவிப்பூ என்றால் மாட்டல், பாடகம் என்னும் காலில் அணியும் கொலுசு போன்ற நகை, இப்படி பல அணிகலன்களை அணிந்து கொண்டு, மார்கழி மாத விரதமான பாவை நோன்பின் ஆரம்பத்தில் "வையத்து வாழ்வீற்காள்" என்ற பாசுரத்தில் சொன்னபடி நெய், பால் ஆகியவற்றைத் துறந்த ஆயர்குலப் பெண்கள், இப்போது விரத முடிவில் கண்ணனை அடையும் மகிழ்ச்சியில் இவற்றை உண்கிறார்கள். ஆடையுடுப்போம் என்றால், முன் ஆடை அணிந்ததில்லை என்று அர்த்தமாகாது. விரத ஆரம்பத்தில் புதிய ஆடைகளையும், ஆடம்பரமான ஆடைகளையும் துறந்த ஆயர் குலப் பெண்கள், இப்போது விரத முடிவில் ஆடம்பரமான ஆடைகளையும் புத்தாடைகளையும் அணிந்து கண்ணனை அடைந்தனர் என்று பொருள்.

பின்னர் விரதத்தை நிறைவு செய்யும் வகையில், பாலிலேயே சமைத்த க்ஷீரான்னம் அதாவது பால்சோறு, நெய்யிலே சோற்றைத் தேடும்படியாக நெய் விட்டு, கையில் எடுக்கும்போது முழங்கை வழியே நெய் வழியுமாறு கூடியிருந்து குளிர்ந்து, அதாவது,கூட்டமாக அமர்ந்து, அனைவரும் கூடி அமர்ந்து,கூடியிருப்பதே மகிழ்ச்சிதானே விலகி இருந்தவர்கள் சேர்ந்துவிட்டதால் கிடைத்த மகிழ்ச்சி மற்றும் உன்னுடன் அமர்ந்து மனம் குளிர உண்டு பிரும்மானந்தத்தை அனுபவிக்க வேண்டும் என வேண்டுகிறார்கள்.

பகவானுக்காகவே இந்த சரீரம் என்பதைப் புரிய வைக்கிறது இந்தப் பாசுரம்.

கண்ணன் கதைகள் (60) - கைசிக ஏகாதசி / நம்பாடுவான்

Image courtesy: Devathirajan swami

கரண்ட மாடு பொய்கையுள் கடும்பனைப் பெரும் பழம்
புரண்டு வீழ வாளை பாய் குறுங்குடி நெடுந்தகாய்
திரண்டு தோளி ரணியன் சினங்கொளாக மொன்றையும்
இரண்டு கூறு செய்துகந்த சிங்க மென்ப துன்னையே

                                                                                       -திருமழிசையாழ்வார்!

திருக்குறுங்குடியின் அருகே உள்ள மகேந்திரகிரி மலையடிவாரத்தில் வசித்து வந்த ஹரிஜன வகுப்பை சேர்ந்தவர் நம்பாடுவான் என்னும் பாணன். வடிவழகிய நம்பியின் மேல் மிகவும் பக்தி கொண்டவர். அக்காலத்தில் அவருக்கு கோயிலுக்கு செல்ல அனுமதியில்லாமல் இருந்தது. கோயிலின் வாசலிலிருந்து பகவானை பார்க்க முடியாது. ஆயினும், வருத்தப்படாமல் தினமும் அதிகாலையில் நீராடிவிட்டு, கைசிகம் என்ற பண்ணில் (பைரவி ராகம்) திருக்குறுங்குடி நம்பியின் புகழை இசைத்து, திருப்பள்ளியெழுப்பும் சேவையை செய்து வந்தார். அவ்விதம் ஒரு நாள், கார்த்திகை மாதம் சுக்ல பட்ச ஏகாதசியன்று கோவிலுக்கு சென்றபொழுது, ஒரு பிரம்ம ராக்ஷஸன் அவரைத் தடுத்து, “ நீ எனக்கு உணவாக வேண்டும்” என்றது. நம்பாடுவானோ,"விரதம் முடித்துவிட்டு பெருமாளை வழிபட்டபின் உனக்கு உணவாகிறேன்" என்று சொல்ல, பிரம்ம ராக்ஷஸன் அதை நம்பவில்லை. அதற்கு நம்பாடுவான்,"பெருமாளின் உண்மையான பக்தன் பொய் சொல்லமாட்டான்'' என்று கூறி பதினெட்டு விதமான சத்தியங்களைச் செய்கிறான். 16 சத்தியங்களைச் செய்தும் ராக்ஷஸன் நம்பாடுவானை விடவில்லை. 17-வதாக நம்பாடுவான்," எவன் ஸர்வவ்யாபியான வாசுதேவனை ஆராதனை பண்ணாமல் இதர தேவதைகளை உபாஸிக்கிறானோ அவனது பாவத்தை அடைவேன்" என்று சொன்னதும் தனது பிடியை விட்டது. பிறகு நம்பாடுவான், 18--வதாக ,"எல்லா உயிரினங்களையும், ஜனங்களையும் காப்பவனும், இயக்குபவனும் , தேவர்கள், முனிவர்கள் முதலியோரால் ஆராதிக்கப்படுபவனுமான அந்த ஸ்ரீமன் நாராயணனையும் மற்ற தெய்வங்களையும் சமமாக பாவிப்பதால் வரும் பாவத்தை நான் அடையாக கடவேன்" என்று சொன்னான். இந்த வார்த்தையைக் கேட்டதும், பிரம்ம ராக்ஷஸ்," சரி சரி சீக்கிரம் உனது விரதத்தை முடித்துவிட்டு வா" என்று அவனை அனுப்பியது.

நம்பாடுவான் கோவிலுக்கு ஓடிச் சென்று, " பெருமானே! இனி உம்மைப் பாடவே முடியாதோ? நான் உம்மைப் பார்க்கவே முடியாதோ ?" என்று எண்ணிக் கொண்டு, கைசிகப் பண்ணை உருக்கமாகப் பாடினார். அப்போது பெருமாள், த்வஜஸ்தம்பத்தை விலகி இருக்கச் சொல்லி நம்பாடுவானுக்கு தரிசனம் தந்தார். திருக்குறுங்குடியில் மற்ற ஸ்தலங்களைப் போலல்லாமல் த்வஜஸ்தம்பம் சற்று விலகி இருப்பதை இப்போதும் காணலாம்.

பிறகு, தான் சத்தியம் செய்தபடி பிரம்ம ராக்ஷஸை நோக்கிச் சென்றபோது, திருக்குறுங்குடி எம்பெருமான் , ஒரு கிழப்பிராம்மணன் வேடத்தில் நம்பாடுவானுக்கு எதிரே தோன்றி, "இங்கே ஒரு பிரம்ம ராக்ஷஸ் இருக்கிறது. அதன் பசிக்கு இரையாகாமல் வேறு வழி செல்" என்று கூறினார். ஆனால், நம்பாடுவான் அதை மறுத்து, அந்த ராக்ஷஸனுக்கு உணவாவதற்காகவே செல்கிறேன் என்று கூறினான். இதைக்கேட்ட பிராம்மணன்,"ஆபத்துக் காலத்திலும், பெண்களுக்குத் திருமணம் செய்ய வேண்டிய சந்தர்ப்பத்திலும், பெண்களுடன் ஏகாந்தமாய் இருக்கும்போதும் பொய் சொல்வதும், சத்தியம் செய்வதும், பாபமாகாது" என்று கூற, நம்பாடுவான்,"நான் செய்து கொடுத்த சத்தியத்தை ஒரு போதும் மீறமாட்டேன்" என்று கூறி, வாக்களித்தபடி பிரம்ம ராக்ஷஸனிடம் சென்று என்னை உண்டு உன் பசியைப் போக்கிக் கொள் என்று கூறினான். நம்பாடுவானைப் பார்த்த பிரம்ம ராக்ஷஸ், "இப்போது எனக்குப் பசியே இல்லை. நான் என் மனதை மாற்றிக்கொண்டுவிட்டேன். நீ விரதத்தால் பெற்ற பலனை எனக்குக் கொடு என்று கேட்க, நம்பாடுவான் மறுத்தான். இன்றைய தினம் உனக்குக் கிடைத்த விரதப் பலனில் பாதியையாவது எனக்குக் கொடுத்தால் நான் சாபவிமோசனம் பெற்று சுய உருவைப் பெறுவேன்'' என்றது. நம்பாடுவான், "உனக்கு ஏன் இந்த பிரம்ம ராட்சச உருவம் வந்தது? என்று கேட்க, பிரம்ம ராக்ஷஸன் தனது கதையைக் கூறினான். "நான் முற்பிறவியில் யோகசர்மா என்ற அந்தணன். யாகத்தை இழிவாகக் கருதிய நான், ஒரு யக்ஞத்தைத் தவறாகச் செய்து கொடுத்தேன். யாகத்தின் நடுவில் இறந்தேன். அதனால் , இவ்வாறு அலைகிறேன்” என்றது. மேலும், உனது தரிசனத்தால் எனக்கு முன் ஜன்ம ஞாபகம் உண்டானது என்றும் கூறியது.

நம்பாடுவான், கைசிகப் பண்ணினால் பகவானைப் பாடிய தன் புண்ணிய பலனில் பாதியை கைசிக துவாதசியன்று பிரம்மராட்சஸனுக்கு தத்தம் செய்துகொடுக்க, அந்த பிரம்ம ராட்சதனின் சாபம் நீங்கியது. நம்பாடுவானும் பலகாலம் பெருமாளை போற்றிப் பாடி மோக்ஷத்தை அடைந்தான்.

இந்த வரலாற்றை வராகமூர்த்தியே தன் மடியிலிருந்த பிராட்டிக்கு உரைத்ததாக புராணம் கூறுகிறது. இன்றும், இந்தப் புராணம் திருக்குறுங்குடியில் நாடக ரூபமாக கைசிக ஏகாதசியன்று இரவு நடக்கின்றது. இதில் நம்பாடுவான், பிரம்ம ராட்சசன், நம்பிக் கிழவன் ஆகிய மூன்று பாத்திரங்களில் நடிப்பவர்கள் 10 நாட்கள் விரதம் அனுஷ்டிக்கிறார்கள். ஒவ்வொரு கார்த்திகை மாதம் சுக்லபக்ஷ ஏகாதசி அன்று எல்லா வைஷ்ணவ கோயில்களிலும் கைசிக புராணம் இன்றும் வாசிக்கப்படுகிறது.

இந்த வரலாற்றை கைசிக ஏகாதசி தினமான இன்று (22-11-2015 ) படித்தாலும் கேட்டாலும் முன்னோர் சாபமும், துன்பங்களும் அகலும். பெருமாள் அருளும் புண்ணியமும் கிடைக்கும். நாமும் இந்த வரலாற்றைப் படித்து, திருக்குறுங்குடி நம்பியின் அனுக்ரஹத்தைப் பெறுவோமாக!

நம்பாடுவானுக்காக நகர்ந்த த்வஜஸ்தம்பம் : 

நம்பாடுவான் பிரம்மராக்ஷஸுக்கு சத்தியம் செய்து கொடுத்தபோது 18 வகை பாவங்களைக் குறிப்பிடுகிறான். அவற்றை வராக புராணத்திலே காணலாம். அவையாவன:

1. சத்தியம் தவறுதல்

2. பிறன் மனைவியிடம் இணைதல்.

3. தன்னுடன் உணவருந்துபவர்களிடம் ஏற்றத் தாழ்வுகளைக் காட்டி, தனக்கு சிறந்ததையும், உடன் உண்பவருக்கு அற்பமானதையும் அளித்தல்.

4. பிறருக்கு தானம் செய்த பொருளை திரும்பப்பெறுதல்.

5. அழகுள்ள பெண்ணை இளமையில் மணந்து, அனுபவித்து, வயதான காலத்தில் குற்றம் கூறி அவளைக் கைவிடுதல்.

6. அமாவாசையன்று மனைவியிடம் சுகம் அனுபவித்தல்.

7. உணவு கொடுத்து பசியாற்றியவனை நிந்தித்தல்.

8. ஒருவனுக்கு தன் பெண்ணை திருமணம் செய்து தருவதாக வாக்களித்து விட்டு, அவ்வாறு செய்யாமல் ஏமாற்றுதல்.

9. சஷ்டி, அஷ்டமி, அமாவாசை, சதுர்த்தி நாட்களில் ஸ்நானம் செய்யாமல் உண்ணுதல்.

10. தானம் தருவதாக வாக்களித்து, பின் தானம் செய்யாதிருத்தல்.

11. நண்பன் மனைவிமீது இச்சை கொள்ளுதல்.

12. குரு பத்தினி, மன்னன் மனைவி மீது காமம் கொள்ளுதல்.

13. இரண்டு மனைவியரை மணந்து, ஒருத்தியிடம் ஆசையும் இன்னொருத்தியை அலட்சியமாகத் தள்ளி வைத்தல்.

14. கற்புக்கரசியான தன் பத்தினியை யௌவனத்திலேயே புறக்கணித்தல்.

15. தாகத்துடன் வரும் பசுவைத் தண்ணீர் குடிக்க விடாமல் தடுத்தல்.

16. பிரம்மஹத்தி செய்தவன், பஞ்ச மகாபாவங்கள் செய்பவன் பெறும் பாபம்.

17. வாசுதேவனைவிட்டு இதர தெய்வங்களை ,தேவதைகளை உபாசனை செய்தல்.

18. ஸ்ரீமன் நாராயணனோடு மற்ற தெய்வங்களையும் மற்ற தேவதைகளையும் சமமாக நினைத்தல்.

மேற்கண்ட பாவங்களைச் செய்தவனுக்கு கிட்டும் பாவமும், தண்டனையும் , செய்த சத்தியத்தை மீறினால் என்னை வந்துசேரட்டும் என்கிறான் நம்பாடுவான்.